Que é CEXTEC?
O Centro de Excelencia Tecnolóxica, Emprego e Coñecemento de Santiago de Compostela (CEXTEC), é un novo organismo que aspira a se converter nunha gran rede integrada por institucións públicas e privadas, coa finalidade de desenvolver proxectos ligados ao talento e o emprego na cidade. A mellor maneira de garantir un futuro para Santiago de Compostela é apostar polo talento.
- Talento e empregabilidade
- Coñecemento e investigación
- Tecnoloxía e innovación
CEXTEC está financiado por Santiago EDUSI (as Estratexias de Desenvolvemento Urbano Sustentable Integrado) “Revive Santiago” e polo fondo Europeo de Desenvolvemento Rexional (FEDER) – Unha maneira de facer Europa.
Por que é preciso?
A creación do CEXTEC reafirma o compromiso do Concello de Santiago co talento. Nunha sociedade tan competitiva como a actual as habilidades e destrezas das persoas e o seu talento son a clave de calquera organización para acadar os seus obxectivos.
Santiago é unha cidade de oportunidades e innovación que procura xerar cada vez máis e mellor emprego. Para iso é preciso atraer e xestionar talento e involucrar a todas as partes clave neste momento decisivo.
Quen integra a Rede?
A finalidade desta Rede de Excelencia é xerar unha comunidade e poñer en valor as iniciativas públicas e privadas relativas á retención, a xestión e o retorno do talento. Trátase de impulsar iniciativas das entidades e persoas colaboradoras. Ademais, formar parte da rede posibilitará o acceso a xornadas específicas de formación, exposicións, presentación de investigacións e outras moitas actividades específicas. Contamos con vós para facela posible.
Unha gran rede que continua medrando
Compostela capital do Talento
O CEXTEC ten como obxectivo favorecer o desenvolvemento dun mercado local de emprego sustentábel, innovador e inclusivo que facilite o incremento da produtividade e a xeración de emprego. Partindo deste horizonte resulta necesario impulsar actuacións para atraer, recuperar e reter o talento na cidade de Compostela.
A xestión do talento esixe unha visión estratéxica e unha aplicación transversal nas organizacións. Desde esta perspectiva, o CEXTEC pretende contribuír a impulsar o coñecemento e a innovación neste campo, así como facer visible o talento e as boas prácticas na súa xestión, impulsando actuacións que conecten o tecido empresarial, as institucións e as persoas.
Para promover o talento como elemento clave no desenvolvemento do territorio, o CEXTEC procurará:
- Crear unha rede de colaboración pública e privada que inclúa empresas, institucións e entidades comprometidas coa perspectiva de impulsar Compostela unha como cidade atractiva para o talento.
- Captar, xerar e difundir coñecemento e propostas innovadoras sobre o emprego e a xestión do talento.
- Impulsar proxectos que conecten o ámbito da investigación coas necesidades das empresas para favorecer medidas atracción, retención e recuperación do talento.
- Formar e orientar ás persoas con talento para a mellora das súas competencias, así como o coñecemento e a inserción no mercado laboral.
