A PARTICIPACIÓN DO CEXTEC NO TALENTIA SUMMIT 2020

/in

A pasada semana, do 23 ao 27 de novembro, o CEXTEC participou na última edición do Talentita Summit. Nesta ocasión o evento, organizado pola área de emprego do Concello de Santiago, tivo un carácter 100% virtual a través da web https://www.talentiasummit.com en todas as súas actividades de Feira: stands virtuais de empresas e entidades; cursos de formación e exames de certificación online; webinars; ofertas de emprego; sesións de mentoring e orientación profesional; entrevistas virtuais con empresas e entidades.

O éxito de participación deste evento enfocado no emprego e na xestión do talento reflíctese nas cifras acadadas nesa semana: máis de 43.000 usuarios/as activos/as; máis de 2.500 usuarios/as nos cursos de formación e nos exames de certificación; máis de 80 stands virtuais de empresas e entidades; máis de 3.000 citas virtuais con empresas e entidades para ofertas de emprego e información xeral; máis de 800 sesións de mentoring e orientación; e máis de 300 ofertas de emprego para máis de 700 postos de traballo.

O CEXTEC colaborou na organización do evento e participou activamente no seu desenvolvemento. Entre as actividades máis destacadas do CEXTEC no Talentia pódense sinalar as que seguen:

  • Contactar, informar e xestionar a presenza de diversas empresas e centros de investigación no evento co obxecto de reforzar a colaboración da rede de excelencia que promove o CEXTEC en todas aquelas iniciativas relacionadas co ámbito do talento.
  • Impulsar a realización de webinars por parte de empresas e centros de investigación que axudasen a difundir as súas iniciativas de innovación e emprego para o incremento do coñecemento e a mellora da produtividade.
  • Expor os obxectivos e actividades do CEXTEC nun stand virtual propio.
  • Atender ás persoas usuarias que solicitaron unha cita virtual co CEXTEC.
  • Difundir o informe sobre xestión do talento na empresa de Santiago de Compostela e área de influencia realizado polo CEXTEC https://www.talentiasummit.com/gl/cextec-centro-excelencia-texnoloxica/ tanto no que se refire ao documento do informe como a unha webinar de difusión dos principais resultados do estudo