Santiago de Compostela acolle as xornadas de Innovación en Bosques Urbanos
As primeiras Xornadas sobre a Innovación en Bosques Urbanos terán lugar en Santiago de Compostela. Continuando a senda marcada polo Carballo do Bosque do Banquete de Conxo, nomeado Árbore do Ano en España 2022, ubicado dentro dun magnífico bosque urbano dentro da cidade.
Celebraranse os días xoves 19 e venres 20 de maio de 2022, no salón de actos da Facultade Medicina da USC. Reserva de prazas dispoñible.
A nosa cidade está vangarda no deseño das cidades e dos bosques urbanos do futuro, e con ese propósito o Concello de Santiago de Compostela, a través do CEXTEC (Centro de Excelencia Tecnolóxica, Emprego e Coñecemento de Santiago de Compostela) organiza estas xornadas sobre a INNOVACIÓN EN BOSQUES URBANOS, adicadas á reflexión para a planificación das cidades, en que se resaltan os bosques urbanos como os elementos vertebradores e de saúde da infraestrutura verde urbana e periurbana.
Contará con conferenciantes de gran prestixio no eido ambiental, pertencentes a organizacións tan relevantes como Bosques sen Fronteiras, a Fundación Biodiversidade, a Universidade Autónoma de Madrid ou a propia Universidade de Santiago de Compostela. E tamén do ámbito empresarial como URBASER, QUANTICAE, HIFAS FORESTA ou ATALAYA TERRITORIO.
Santiago conta cunha superficie de espazos verdes que supera amplamente os estándares marcados pola OMS. Reivindicar e manter o noso patrimonio natural é un obxectivo que mellorará a vida da nosa cidadanía, potenciará o atractivo turístico da cidade e favorecerá o crecemento dunha nova xeración en harmonía cos valores ambientais.
As xornadas celebraranse no Salón de Actos da Facultade Medicina da USC durante os días xoves 19 e venres 20 de maio. A asistencia é gratuíta, simplemente é preciso reservar praza na web das xornadas. Están dirixidas principalmente a técnicos/as de medio ambiente, técnicos/as de parques e xardíns, urbanistas, arboristas, arquitectos/as, profesionais relacionados coa Infraestrutura Verde e estudantes do ámbito ambiental e urbanístico.
Esta iniciativa afonda na liña na que se leva traballando dende o Concello de Santiago con múltiples actuacións de calado destinadas á valorización do noso patrimonio natural.
O 55% da poboación mundial vive en cidades e prevese que esta proporción siga aumentando nos próximos anos. Ante o crecemento urbano continuo e a presión ambiental, polo cambio climático e a contaminación, a cidade necesita solucións sustentables, intelixentes e ecolóxicas que melloren a saúde da cidadanía e a eficacia ambiental e enerxética. Os bosques urbanos xogan un importante papel na mitigación dalgúns destes impactos, é por iso que se deben ter moi en conta na planificación das nosas cidades.
Coa recente aprobación da Estratexia Nacional de Infraestrutura Verde e a posta a disposición dos Fondos Next Generation para o seu emprego polos estados membros, existe unha grande oportunidade no sector ambiental urbano que debe ser aproveitada.
DATAS
XOVES 19 E VENRES 20 MAIO DE 2022
REXISTRO DE ENTRADAS ONLINE
Requírese confirmación previa de asistencia mediante este rexistro online.
A entrada é gratuíta.
Teléfono de contacto para consultas ou asistencia por Whatsapp: 604 001 451
Email de contacto: cextec@santiagodecompostela.gal
UBICACIÓN
Salón de Actos da Facultade Medicina – 1ª planta
Facultade de Medicina (USC), na rúa de San Francisco, s/n, 15782, Santiago de Compostela
Link para a reserva de prazas:
https://www.cextec.com/xornadas-innovacion-bosques-urbanos/
Programa completo das xornadas INNOVACIÓN EN BOSQUES URBANOS
