OS DATOS DO TALENTIA APÓS A PRIMEIRA SEMANA

Talentia Summit ´21 chega ao seu ecuador con éxito de participación: máis de 37.000 usuarios activos na feira virtual, que continuará aberta ata o vindeiro venres 26 de novembro. Entrevistas con empresas, ofertas de emprego, cursos de formación en directo, webinars e a unidade de desenvolvemento profesional a un golpe de clic para reservar praza de balde.

Tras cinco días de actividade frenética tanto na contorna virtual coa Feira do talento, como durante a xornada deste xoves 18 no Foro, Talentia Summit ´21 presenta os seguintes datos de participación:

– 37.854 usuarios activos na Feira Virtual Talentia.
– 2.150 usuarios en cursos de formación e certificacións oficiais.
– 1.812 currículums intermediados para as 320 ofertas de emprego, con 868 vacantes para 85 empresas participantes.
– 1.399 vídeochamadas nas citas virtuais con empresas.
– Máis de 750 entradas reservadas no Foro Talentia.
– Máis de 2.500 páxinas vista no seguimento vía streaming do evento.

Seguimento estatal do Talentia Summit 
A feira continúa consolidándose como o maior encontro do talento e o emprego a nivel estatal. Unha boa mostra delo é que a cidade dende a cal se conecta o maior volume de usuarios é Madrid, seguida das cidades galegas Santiago de Compostela, A Coruña e Vigo. Destaca tamén Barcelona no quinto posto seguida das cidades de Lugo e Narón. Finalmente, as empresas salientan a comodidade do proceso de citas virtuais, empregando a videoconferencia para conectar e coñecer os candidatos que se postulan ás ofertas de emprego activas.

Unha segunda semana chea de actividade na web de Talentia Summit ´21
Esta segunda semana continúan as entrevistas de traballo para as diferentes ofertas de emprego activas con centos de sesións dispoñibles para realizar videochamadas e establecer contacto directo cos responsables de captación de talento e recursos humanos das empresas. Tamén se estrearán novos webinars, seminarios virtuais impartidos por representantes das empresas que amosarán información relevante sobre a súa actividade e a situación do sector, todo elo cun achegamento formativo e didáctico.

Foro Talentia Summit
Á Feira sumouse o Foro Talentia Summit 2021, que se celebrou o pasado xoves 18 no edificio Fontán da Cidade da Cultura e que foi inaugurado polo presidente da Xunta, Alberto Núñez Feijóo; a ministra de Educación e Formación Profesional, Pilar Alegría; e o alcalde de Santiago, Xosé Sánchez Bugallo. Nesta edición de Talentia Summit combínanse os formatos presencial, para o Foro, e online, para a Feira, que se desenvolve paralelamente do 15 ao 26 de novembro.