O pasado 29 de xuño desenvolvouse o Obradoiro de empregabilidade con Finsa, no que era a primeira xornada do ciclo promovido polo CEXTEC “O talento como motor de crecemento”. Este ciclo de xornadas ten como obxectivo achegar a realidade empresarial ás persoas desempregadas, dar a coñecer as perspectivas de emprego e os perfís máis demandados polas empresas, transmitir cales son as competencias que máis se teñen en conta para as novas incorporacións, divulgar as fontes de recrutamento que usan e explicar como son os seus procesos selectivos.

Nesta primeira xornada completouse a capacidade prevista de 100 persoas no salón de actos do edificio municipal Cersia. Contamos coa presenza de dúas técnicas do equipo de recursos humanos de Finsa, Gisela Mato e Patricia Martínez, quen realizaron unha exposición didáctica e divulgativa para favorecer a aprendizaxe das persoas asistentes; o carácter práctico do acto completouse cunha entrevista simulada cunha persoa voluntaria, que permitiu exemplificar cales son as preguntas máis habituais e que cousas se valoran das respostas. Ao éxito de asistencia engadiuse unha elevada participación do público asistente nunha extensa quenda de preguntas.

Esta xornada foi gravada e proximamente difundarase nas nosa web e redes sociais.

O persoal técnico do CEXTEC segue mantendo unha axenda de contactos con empresas de diversos sectores para reforzar e/ou ampliar a rede de excelencia no emprego a través da colaboración público-privada. Esta semana foi a quenda de dúas das principais empresas de distribución alimentaria, Vegalsa-Eroski e Gadisa.

O luns 28 de xuño o persoal técnico do CEXTEC desprazouse á sede central de Vegalsa na Coruña para manter unha reunión con Nuria Bregua, técnica do equipo de RRHH da empresa. No encontro expuxéronse as perspectivas e iniciativas relacionadas coa xestión do talento e o emprego en que están envolvidas as partes e tratáronse as posibilidades de colaboración da empresa tanto nas iniciativas do CEXTEC como en xeral da área de emprego do Concello de Santiago.

O mércores 30 de xuño o persoal técnico do CEXTEC tivo unha reunión por vídeo-conferencia coa técnica de RRHH de Gadisa, Patricia Guitián, con que tamén se abordaron as posibles vías de colaboración en iniciativas para a captación e a retención do talento.

O Concello de Santiago de Compostela, a través do CEXTEC (Centro de Excelencia Tecnolóxica, Emprego e Coñecemento de Santiago de Compostela) organiza un ciclo de xornadas sobre o emprego, o talento e o desenvolvemento económico, en que axentes do tecido produtivo e da comunidade investigadora de Compostela transmitirán os seus coñecementos e iniciativas na xestión do talento para innovar, mellorar a produtividade e crear emprego de calidade.

O ciclo ten o obxectivo xeral de valorizar o talento como o elemento clave para a innovación e o crecemento económico, no marco dun modelo sustentable que garanta o emprego digno. Pódense sinalar como obxectivos específicos:

• Apoiar a difusión e a transferencia de coñecementos e boas prácticas na xestión do talento.
• Favorecer o coñecemento da realidade empresarial para mellorar a empregabilidade.
• Axudar ao desenvolvemento das competencias para o emprego e ao descubrimento dos talentos.
• Contribuír ás iniciativas que favorezan a captación e a retención do talento.
• Contribuír ao desenvolvemento de redes de colaboración entre entidades públicas e privadas para reforzar a innovación e a excelencia no emprego.

A primeira xornada do ciclo contará coa participación de Finsa, a principal empresa de Santiago de Compostela en termos de facturación e número de persoas empregadas. O equipo de RRHH de Finsa impartirá un obradoiro de empregabilidade que busca dar a coñecer cales son os perfís e as competencias máis valoradas na empresa, así como o desenvolvemento dos seus procesos de selección.

Esta xornada diríxese prioritariamente a persoas desempregadas con estudos de bacharelato, ciclos de formación profesional (ou equivalentes), ou ben con experiencia no ámbito industrial.

O obradoiro será presencial, no salón de actos do edificio Cersial, o martes 29 de xuño ás 11.00 h. É imprescindible a inscrición previa na web: https://www.cextec.com/formulario-obradoiro-finsa/

O pasado luns 21 de xuño o persoal técnico do CEXTEC estivo nas instalacións en Santiago de G12 Grupo Empresarial de Servicios. Acompañou a visita Rosa Arias, Responsable do Centro de Formación G12 Santiago,  quen mostrou as aulas e os equipamentos de diversas especialidades homologadas.

O persoal técnico do CEXTEC estivo onte nas instalacións de FINSA en Santiago de Compostela cos técnicos de recursos humanos Gisela Mato e Luis Carreira. A visita á planta foi guiada polo propio persoal de recursos humanos de FINSA, que detallou o proceso de produción e os traballos que se desenvolven nos distintos espazos. O encontro tamén permitiu coñecer os perfís e as competencias máis valoradas pola empresa, intercambiar perspectivas sobre a xestión do talento e abrir vías de colaboración para iniciativas relacionadas co emprego.