O Concello de Santiago, co respaldo da Rede de Excelencia do CEXTEC, presenta a súa candidatura á iniciativa da Comisión Europea “100 Intelligent Cities Challenge” para desenvolver o Proxecto “SANTIAGO IN”. Este proxecto supón a aposta por unha estratexia de transformación dixital para unha cidade sustentable e intelixente, que xere oportunidades, promova o talento e cree emprego de calidade.

Atendendo á dita estratexia a proposta do Concello de Santiago inclúe catro obxectivos: educación innovadora para mellorar e recapacitar; incentivo de start-ups, pemes e economía social nas áreas de coñecemento cultural, biotecnolóxica e industrial; turismo intelixente e sustentable; mobilidade e transporte intelixentes e ecolóxicos.

O CEXTEC, concretamente o Concello de Santiago xunto coa Vicerreitoría de Igualdade da Universidade Santiago a través do programa Woman Emprende, elaborou un programa que ten como obxectivo principal favorecer a contratación do talento feminino, eliminando calquera nesgo de xénero, consciente ou inconsciente, que exista nos procesos de selección.

O dito proxecto, denomimado Talento en Feminino, vaise presentar nos próximos días á convocatoria REC (Dereitos, Igualdade e Cidadanía) da Comisión Europea. As diversas actividades que se propoñen no proxecto céntranse en dotar ás empresas e aos/ás profesionais de xestión das persoas de coñecementos e ferramentas de innovación tecnolóxica que favorezan a presenza da muller no mercado laboral en condicións de igualdade, coa erradicación dos nesgos e prexuízos existentes nos procesos de selección e no propio ámbito laboral.

Para fortalecer e consolidar no tempo estas actuacións procurarase a coordinación e a implicación de todos os axentes socioeconómicos de Compostela, aproveitando para iso ferramentas do CEXTEC como o Observatorio e a Rede de Excelencia no Emprego.

Ademais de promocionar a produción académica relacionada co talento, o CEXTEC porá en valor as boas prácticas empresariais na xestión do talento mediante unha distinción pública do Concello de Santiago.

No 2020 realizarase a primeira convocatoria deste premio, que terá concorrencia competetitiva, dirixida a empresas con domicilio fiscal e social ou un centro de traballo situado no Concello de Santiago de Compostela.

Trátase de recoñecer iniciativas relacionadas coa retención e a captación do talento, comprendendo actividades, programas ou modos de xestión das persoas, que aporten valor, contribúan a un desenvolvemento saudábel da organización, á xeración dun emprego de calidade e ao incremento da produtividade.

O CEXTEC ten como obxectivo promover o talento, e as boas prácticas na súa xestión, para favorecer o desenvolvemento dun mercado local sustentable, innovador e inclusivo. Como punto de partida para impulsar propostas e actividades resulta necesario coñecer o estado da cuestión na comarca de Compostela, polo que desde o CEXTEC se iniciou un estudo diagnóstico sobre a xestión do talento.

Este estudo de investigación céntrase nos datos e nas perspectivas das empresas de Santiago e a súa área de influencia sobre a cuestión do talento, atendendo a diversos aspectos: recrutamento e selección do talento; retención do talento; “employer branding”; conciliación da vida persoal e laboral; formación continua; desenvolvemento da carreira profesional; clima laboral; cuestións xerais e autovaloración na xestión do talento.

Para a realización deste estudo contactarase con perto de 500 empresas da comarca de Compostela, coa perspectiva de conformar un panel de empresas que permita realizar estudos anuais sobre a materia e comprobar así a evolución na xestión do talento. Estas investigacións sobre o mercado laboral serán as que de xeito principal dean contido ao Observatorio do CEXTEC e estarán a disposición das empresas e da cidadanía en xeral na nosa web.