O edificio Fontán da Cidade da Cultura acolleu onte o Foro Talentia Summit 2021. Asistiron unhas 300 persoas ao evento, que foi inaugurado co intervencións do presidente da Xunta, Alberto Núñez Feijóo, da ministra de Educación e Formación Profesional, Pilar Alegría, e do alcalde de Santiago, Xosé Sánchez Bugallo. Tras os discursos institucionais o acto continuou cos relatorios de profesionais de diversos ámbitos que reivindicaron o valor do talento coas súas reflexións. Así interviñeron:

– Elena Gil, Global Director of Product and Business Operations – Telefónica IoT & Big Data
– David Meca, 28 veces campeón do mundo de natación
– Nancy Villanueva, CEO Iberia & Middle East de Interbrand
– Carlos Ezquerro, CEO de Netex Learning
– Clara Jiménez Piñar, Directora de Innovación Accenture, Spain Innovation Lead
– Irantzu Díaz, Market Manager de IKEA en Galicia
– Pau Gacía Milá, Emprendedor de éxito – Innovator of the Year by MIT’s TR-35
– Emilio Froján, CEO & Co-founder de Velca

Parte dos profesionais que interviñeron no Foro

O talento artístico tivo tamén a súa representación neste encontro a través da música do pianista Javier López Jorge acompañado de María Victoria Jericó como vocalista e Millán Abeledo Malheiro ao violonchelo.

Co Foro finalizado, o Talentia Summit continúa no formato feira até o 26 de novembro con cursos, exames de certificación, encontros con empresas e profesionais… con diversas actividades para as que aínda quedan prazas dispoñíbeis na web https://www.talentiasummit.com/

O próximo mes teremos unha nova edición do Talentia Summit. Este ano amplíanse os días do evento, que será do luns até o venres 26 de novembro. Ao igual que o ano anterior manterase un formato híbrido, cunha feira virtual e cun foro presencial o día 18 no Edificio Fontán da Cidade da Cultura. Toda a información, e o propio evento virtual, estará progresivamente dispoñíbel na web https://www.talentiasummit.com/

Xa desde os meses previos o persoal técnico do CEXTEC se envolveu no deseño e planificación desta edición do Talentia. Nos próximos días presentaranse todas as actividades e participantes do evento que, aínda que incorporará novidades, manterá os elementos principais de anteriores edicións: ofertas de emprego; cursos de formación; casetas virtuais de empresas; webinars; certificados oficiais; sesións de mentoría e orientación profesional; relatorios; etc.

O ano pasado o Talentia Summit contou con máis de 45.000 usuarios/as activos, máis de 300.000 páxinas vistas, 80 empresas e entidades participantes, máis de 2200 entrevistas/citas virtuais con empresas, máis de 450 ofertas de emprego xestionadas para máis de 900 postos de traballo, máis de 100 actividades formativas con máis de 1700 persoas inscritas nelas, máis de 340 inscricións para examinarse de 20 certificacións, máis de 400 sesións de orientación laboral e mentoring, e 13 webinars. El CETEC tamén tivo caseta virtual propia e participou no deseño, planificación e execución do evento.

 

 

O mércores 15 de setembro celebrouse a que xa é a cuarta xornada do ciclo “O talento como motor de crecemento” organizado polo CEXTEC, nesta ocasión protagonizada pola empresa do polígono da Costa Vella BRICOMART. Tivemos connosco a Xesús Pérez Vilar, xefe de sector e impulsor de talento e contratacións en Bricomart Santiago. Dun xeito dimámico e participativo, ao longo de dúas horas, tratáronse aspectos organizativos da empresa, identificáronse os perfís máis demandados e as competencias máis valoradas, aclaráronse cales son as fontes de recrutamento e explicáronse as características dos seus procesos de selección.

                  

A xornada desenvolveuse no salón de actos do edificio municipal Cersia, que contou coa presenza de máis de 60 asistentes. Despois do relatorio houbo unha ampla participación do público na quenda de preguntas.

 

 

O pasado 20 de xullo VEGALSA EROSKI adheriuse formalmente á Rede de Excelencia no Emprego do CEXTEC, amosando dispoñibilidade para colaborar naquelas iniciativas relacionadas coa retención, capatación e retorno do talento.

O Concello de Santiago de Compostela puxo en marcha no 2020 o Centro de Excelencia Tecnolóxica, Emprego e Coñecemento (CEXTEC) coa finalidade de favorecer a atracción e a retención do talento na nosa cidade.

O CEXTEC impulsou unha Rede de Excelencia, da que xa fan parte a Universidade de Santiago de Compostela e máis de 40 empresas, que ten como obxectivo desenvolver proxectos e actividades conxuntas, así como valorizar todas aquelas iniciativas públicas e privadas ligadas ao talento e ao emprego. Neste 2021 temos como obxectivo ampliar e reforzar a colaboración coas empresas e axentes económicos e sociais comprometidos co emprego e a xestión do talento.

O pasado 15 de xullo desenvolveuse a segunda xornada do ciclo, promovido polo Cextec, “O talento como motor de crecemento”. Nesta ocasión contamos coa presenza da técnica de recursos humanos de Gadis Patricia Guitián, que expuxo as claves principais do proceso de incorporación á empresa co relatorio “Camiño ao emprego en Gadis”. Concretamente tratáronse aspectos organizativos da empresa, identificáronse os perfís máis demandados e as competencias máis valorados, aclaráronse cales son as fontes de recrutamento e explicáronse as características dos seus procesos de selección.

       

A xornada desenvolveuse no salón de actos do edificio municipal Cersia, que contou coa presenza de máis de 80 asistentes. Despois do relatorio houbo unha ampla participación do público na quenda de preguntas.

O persoal técnico do Cextec segue acordando a colaboración de máis empresas para as novas xornadas do ciclo, que se irán anunciando nas próximas semanas.